پایگاه خبری لرنا

شعر از حجت­الاسلام روشن سلیمانی

به نام او خدا که لر آفری

زینه.پیا.دور وکرآفری*

به پیایلس داده دبیت وچوقا

به زنگلس شلوار قری ومینا *

کرده به دنیا لروادیاری

داده بسون غیرت بختیاری*

عشق علی وآلس دابه لر

زعشق خوس کرده دلاسون پر*

افتو داده به لر و گگونسه

مه ن نها به منجقابهونس*

وارگه لر جور بهشت آفری

اگوی به غیر لر به دنیا نبی*

چنوبسون داده زناز ونعمت

 اگوی به غیر لر نداره قیمت *

لرهمه جا عزیز مردم آوی

واهمه ایل وطافه ها قوم آوی*

تمام دنیا زگگونم پره

ایر منم که نصف دنیا لره*

هخامنش زایل مو ورستا

 پخش وپلا واوی به من دنیا*

مو تاته زا کوروش واردشیرم

موتخت جمشیدم وبرد شیرم*

زاینده رود ودز وکارون منم

زنسل سلمون مسلمون منم*

مو بختیاریم زنسل افتو

صاف دلم پاک دلم جور او*

هرچه که خواستیم خدا بمون دا

خداگپی خس به لرنشون دا*

گپی وغیرت و وفا ودین دا

درخت کینو واو وزمین دا*

خدادلی داده به لر جور او

داره نظربه ایلمون روز وشو*

تنگ منار لر گگه آسمونه

ایل مو سیبه قدرخس ندونه*

تنگ منار ز درد مو چه دونی

ز درد مو که وندم ز زونی*

ایل گپم رهده به کوری ای داد

گگون مو ایلم دادن به باد*

رهده ز ویر ایل مو گویری

رهده به کوری گپی وگفتری*

ز ویرمو رهده ملار وچمتر

دو وکره.روغن خش.خیگ پر*

به شهر اویدیم ولرین هشتیم

دبیت وشلوار قرین هشتیم*

نه اسبی وتفنگی وسواری

نه کرپلی ایاه وادیاری*

نه شیر ممصالح سوار راکی

نه ایزنن دی کل بساکی*

نه زنگل زصد پیا بهترم

نه پیایل گذشته دور و برم*

تنگ منار دل موپر زحینه

دل مو چشمه دل تو زمینه*

دل موچشمه دل توپیاله

موایگریوم تو بزن به گاله*

تنگ منار یادته افتو ومه

یادته چوقاودبیت و کله*

دبیت وچوقادروین ز ور

ز گیوه وشال وکله نی خور*

لچک وشلوار قری جم آوی

زحونه ها رخت لری کم آوی*

تنگ منار غیرت هفت وچاری

نره زویر ایل بختیاری*

تنگ منار دنیا وفا نداره

دنیا درختی که سانداره*

تنگ منار سیت اکنم درد دل

چنو اگم سیت که ورستی واکل*

تنگ منار سی ایل بختیاری

شعری گدم بمنه یادگاری*